La empresa encargada de la redacción del plan pal polígonu de Colunga, nun respuende ‘nin al teléfonu’ depués de cobrar  17.545 euros por adelantao ensin faer el trabayu

Cuando s’entamó a falar d’esti polígonu, nel 2020, l’alcaldesa -entós del PSOE- aportunó na importancia de cuntar con un polígonu nel conceyu como ferramienta para’l so desenvolvimientu nos prósimos años, afirmando tener yá delles solicitúes per parte de pequenes empreses, venceyaes sobremanera al sector primariu, pa istalase nél. Pocu dempués asignaben a una empresa privada pa redactar el plan parcial sobro’l que se llevantaría’l polígonu, empresa que cobró n’avientu del 2022 -poco primero de les elecciones municipales- la factura de 17.745 correspondiente a la realización íntegra del plan, qu’entá nun realizara. 
Nel 2023, tres los comicios y yá col popular Jose Ángel Toyos al frente, el Conceyu plantega un cambéu p’amenorgar la superficie y entainar la so creación, tratando asina d’afalar la culminación del proyeutu. D’aquella, el plan parcial pal so desendolcu cuntaba yá col informe ambiental estratéxicu de la Conseyería d’Alministración Autonómica, Mediu Ambiente y Cambéu Climáticu, pero’l plan en sí siguía ensin tar disponible. 
Hasta’l momentu nengún responsable municipal supo dar cuentes de por qué se-yos pagó anantes de presentar el plan nin se sabe a quien reclamar el trabayu. Dos años dempués de pagar la factura, l’alcalde de Colunga, José Ángel Toyos, propón dar por perdies les perres, rescindir el contratu a los actuales redactores y encargar el trabayu a otru equipu que lleve a términu la realización del correspondiente plan parcial.

Anque se desconoz la sede física de la empresa y nun contesten nin correos nin al teléfonu -esto ye, tán illocalizables- Toyos afirma que va evaluase la reclamación de la cuentía correspondiente polos trabayos non realizaos. Ye d’esperar que s’evalúe tamién la reclamación a los responsables de la escoyeta pal llabor d’esta empresa pantasma y del so pagu irregular.