L’asociación Horru online tien catalogaos 118 horros, de los que va denunciando el mal estáu de de 50, repartios en 26 de los 78 conceyos asturianos
Acordies el gobiernu asturianu, hai más de 20.000 horros, paneres ya cabazos n’Asturies. A xineru del añu 2025 nun hai dengún declaráu BIC, informen n’Horru online, amestando que por contra si qu’hai 121 ilesies que reciben esa proteición, rescamplando la diferencia ente la importancia que se da al padremuñu relixosu ya’l que pertenez al pueblu asturianu.
Esta asociación, qu’entamó reclamando pol abandonu de los horros nel conceyu Illás, espardió el so llabor per toa Asturies, recoyendo por agora información d’horros en pelligru en 26 conceyos y pidiendo collaboración ciudadana pa continuar con esti rexistru.
Nesti casu trátase d’un horru allugáu en Cueru, conceyu Candamo, que nel añu 2013 taba en pie y pocu más de diez años depués presentaba la llaceriosa apariencia que se ve na semeya. En xunetu del 2024 féxose la comunicación del estáu del horru énte’l Serviciu Conservación del Padremuñu y na mesma feca comunicáronse los fechos al Ayuntamientu Candamu. Dende entos, nesti casu comu en tolos denunciaos ante Padremuñu y ante los correspondientes conceyos, nun hebio dala rempuesta.
“Ye una llástima qu’atopando un horru qu’entá se coñoz pol nome del dueñu, tea nesti estáu proximu al esbarrumbe ya que naide faga nada por torgalo” declaren los denunciantes.
Llucía F. Marqués
This work is licensed under a Creative Commons Attribution 4.0 International License.
