Coles actuales plantes en furrulamientu Asturies yá tien trés vegaes más capacidá de tratamientu que les borrafes que se xeneren, pero los proyectos multiplíquense ¿Piensen traer la basoria d’España pa que la xestionemos equí?
La rehabilitación de la cantera de Vienta la Salve, en Siero, tenía qu’efectuase tres l’abandonu de la esplotación, va dellos años, con rellenu de tierres llimpies. Los distintos proyectos presentaos pola promotora Tramisa, S. A, recueyen defectos que faen invidable la execución de les obres,

L’actual trátase d’un proyectu que lleva tramitándose dende 2017 y que supón la instalación d’una planta de tratamientu de borrafes de la construcción (RCD) n’actual cantera abandonada. Estes instalaciones tendríen la capacidá de 50.000 tonelaes de borrafes al añu.

El proyectu tien dellos fallos, como’l fechu de que les zones de machaqueu y peneráu taríen en parte albentestate, lo que favorez la dispersión de povisa y l’impactu acústicu; nun se tuvo en cuenta l’efectu acumulativu de les diverses actividaes que se desenvuelven na zona de la cantera, como son la planta de formigones colindante, l’autovía o’l circuitu de motocross y nun se tien en cuenta’l suministru de l’agua pal procesu, nin el saneamientu de les agües residuales que se xeneren o l’afección a agües soterrañes. Otra posible molestia ye l’impactu del tránsitu de camiones que van tresportar les borrafes, tantu l’acústicu como’l dañu estructural que causaríen na carretera SI-8 (Pola de Siero – Valdesoto).

Sospriende la cantidá de proyectos de plantes de recuperación de borrafes de construcción que se pretenden n’Asturies (2 en Siero), cuando coles actuales plantes en funcionamientu yá tenemos trés vegaes más capacidá de tratamientu que les borrafes que se xeneren, polo que se deduz que pretenden importar borrafes de construcción d’España.

Nel Dos Santos