El plenu de Xixón votó en contra de la declaración de zones tensionaes pa los barrios xixoneses depués de que fore esi mesmu plenu el que nel mes de payares de 2023 solicitare al Principáu aniciar los tramites pa ella

La negativa del executivu xixones podría ser valera, una bones les competencies al respeutu son autonómiques ya’l Principáu podría continuar cola tramitación de la reconocencia de -polo menos- esos barrios xixoneses  como zona tensionada, permitiendo tomar midíes comu llendar los alquileres y l’usu turísticu de les viviendes. En Cimavilla, una de ca diez viviendes nun lo ye y los alquileres, aparte d’inasequibles, namás tan disponibles de xunu a setiembre; nel barriu l’Arena la situación ye asemeyada.

Dende los partíos nel gobiernu xixonés proponen costruir más vivienda y bonificar fiscalmente a los caseros p’afalalos a alquilar -hai más de 9.000 viviendes vacies en Xixón-, ello ye, favorecer a los propietarios mientres se yos permite poner los precios que quieran, una bones el mercáu inmobiliariu actual ta copau por foriatos, turistes ya inversionistes a los que nun yos duelen los precios altos. 

De fechu, son munches les voces que piden qu’esa declaración de zona tensionada s’estienda a otros barrios de Xixón, dao que yá tan entamando a notase los efeutos de la xentrificación en barrios fasta agora obreros, comu’l Natahoyu o La Calzada, onde medren los pisos dedicaos al turismu y los alquileres duplicaron el so preciu nos caberos cinco años. 

Nesi sen, Llucía Fernández, vocera d’Andecha Astur y residente nel Natahoyu, declaraba que “Hai que saber anticipar lo que vemos que va ocurriendo n’otros barrios, onde les necesidaes de los visitantes tan perriba de les de los propios ciudadanos. Les viviendes, por definición son pa vivir. Nun pueden tener una función especulativa, muncho menos cuando existe, comu ocurre nesti momento, una necesidá social”.

Nel Dos Santos

This work is licensed under a Creative Commons Attribution 4.0 International License.