Bonos díes, bona xente.
Alborecemos con intervalos nubosos entemecios ente dellos claros o abancios, ya con unes temperatures que tan alrodiu de los 4ºC, rexistrándose nel puirtu Payares -4ºC. onde hai muncha nublina.
Güei vamos tener intervalos nubosos con xarabatos intermitentes más probables na fastera centru-oriental d’Asturies y sobre too pela tarde. La cota de nieve va tar mui baxa n’esti alborecer pudiendo surdir pelos 500m, subiendo dempués a los 700m. L’aire va ser de componente norte con dalguna racha moderada en zones espuestes.
Mañana sábadu alboreceremos con nubes ya claros y delles nublines no fonderu los valles con xelaes nes zones favoretibles. Pela tarde volverá a nublar ya tendremos precipitaciones febles ya intermitentes que tornarán a ser de nieve perriba de los 700m, baxando dalgo más durante’l riscar del domingu. Les temperatures camudarán poco calteniéndose un ambiente ivernal.
El domingu va tar más soleyeru y recuperaranse dalgo les temperatures másimes anque l’aire nordés pue ser cafiante nel llitoral y zones espuestes baxando la sensación térmica.
Que paséis un bon vienres collacies ya collacios.
This work is licensed under a Creative Commons Attribution 4.0 International License.
