L’Asociación de docentes d’asturianu y eonaviego/gallego-asturiano (ADAE) denuncia’l desdexamientu de la Conseyería d’Educación énte la ensiñanza de Llingua Asturiana , apuntando a una llarga riestra de deficiencies y faltes de previsión qu’afeuten la disponibilidá y la calidá del enseñu del asturianu.

“La dexadez na planificación y la falta de rempuestes nun pueden siguir siendo la norma.”

L’asociación d’ensiñantes denuncia que les bolses d’esta especialidá en secundaria tan ya escosaes, ensin qu’hasta’l momentu procedieren a la so apertura, lo que va torgar cubrir les baxes y va dexar al alumnáu ensin profesoráu, como yá asocedió en cursos pasaos. “Esta falta de rempuesta per parte de la Conseyería pon en riesgu’l drechu del alumnáu a recibir una educación de calidá, lo que tamién va tener un impactu na matriculación” declaren.

Per otru llau, la Conseyería sigue ensin autorizar la puesta en marcha del cursu d’A2 de Llingua Asturiana nel CEPA del Nalón, a pesar de qu’hai 21 persones adultes inscrites dende’l mes de setiembre. Tamos yá nel mes de marzu y l’alumnáu sigue ensin recibir rempuesta, lo que supon una nueva torga pa quien quier ameyorar la so competencia n’asturianu.

Amás, un añu depués del anunciu de la Conseyera d’Educación de la implantación de la enseñanza de llingua asturiana na etapa d’Infantil y nes Escueles Oficiales d’Idiomes, nun hai información dalguna sobre la so puesta en marcha. La incertidume sigue siendo la tónica dominante, a pesar de que la midida tendría d’empezar a aplicase en setiembre d’esti añu. Dende ADAE tienen mieu que les 103 places anunciaes nun seyan tales y obliguen a asumir la docencia a otres persones del centru habilitaes, aumentando asina la carga docente y menguando los recursos personales p’atender a les diferencies individuales.  

A tolo anterior súmase la situación del maestru de Llingua Asturiana del CP Valdellera (Llanes), que tien al so cargu dende’l mes de xineru a 29 alumnos y alumnes nuna sola aula, superando la ratio establecio. Esto débese a la negativa de la Conseyería a aumentar la xornada del docente, alegando qu’otra persona del centru ta habilitada pa ello, lo que supondría un cambiu d’horarios y l’amenorgamientu de refuerzos educativos nun centru con recursos personales yá de por sí deficitarios.

Susana Sela

This work is licensed under a Creative Commons Attribution 4.0 International License.