Cola xubilación de los responsables del penúltimu negociu dedicáu a facer quesu baxo la Indicación Xeográfica Protexida los Beyos, queda namás una quesería n’activu

La quesería Picu’l Sella, allugada en La Fresneda (Amieva) queda sola dientro la IXP los Beyos, concedía nel 2011 pola Comisión Europea.

Depués de 38 años dedicándose a la ellaboración y venta de quesu los Beyos, Salvador Pilar y Aurora González, propietarios de la quesería artesanal La Collada, en Cirueñu (Amieva) vienen de xubilase. 28 primeros premios en concursos de quesu d’esta variedá y un ‘Meyor quesu d’Asturies’ son testigu de la calidá de les sos ellaboraciones, pero nun hai relevu  y dende l’ún de marzu nun faen quesu. El caberu vienen de vendelu esti fin de selmana en mercáu de Cangues.

De nun retomase l’actividá na quesería -pendiente del estáu de salú d’una de les fies del matrimoniu- el riesgu de perdese una de les variedaes queseres reconocíes n’Asturies sedría grande, desaniciándose una pieza más del bayurosu padremuñu asturianu y perdiéndose otru mediu de vida tradicional na fastera rural, con tola perda cultural y económico qu’ello trai consigo.

Llucía F. Marqués