Los caberos datos disponibles -del añu 2023- apunten a qu’unos 170.000 asturianos -el 16,9% de los llares- nun puen permitise calefacción nin agua caliente. La cifra, que medra añalmente, va disparase nel 2025 depués de la desapaición del descuentu del bonu social a lo llargo’l 2024

El bonu térmicu social ye un programa d’aides de concesión directa destinaes a apanguar la probitú enerxética en consumidores vulnerables. La so finalidá ye garantizar el suministru d’enerxía y ta especialmente empobinao a qu’estos usuarios cuenten con agua caliente y calefacción nos meses más frios del añu.

Son ente 35 y 372 euros colos que gabitar el pagu de la factura la lluz, una cifra ente escasa y ridícula pa tol añu, pero que nes economíes más febles pue marcar la diferencia pente un bon mes y unu malu. 

Estes perres, a les que tienen drechu decenes de miles d’asturianos, nun tan aportando a quienes les necesiten, ya que bien entamáu el 2025 sigui pendiente d’ingresu el bonu social del añu 2023, ensin que se den desplicaciones al respeutu.

Les families monoparentales, los pensionistes y les persones con dalguna triba de discapacidá son les más perxudicaes pola probitú enerxética. 

Nel Dos Santos