Na nueva señalización alcontramos l’asturianu en segundu llugar, en tamañu muncho menor ya ensin prietina, al mesmu nivel que la torna al inglés
El Conceyu Xixón cunta con un Plan de Normalización Llingüística aplicable dende’l 2024. Nel mesmu recuéyense cuestiones comu que la imaxe corporativa, llogotipos ya identidá gráfica que se renueve nel conceyu han dir en billingüe, asina comu la señalización de llugares d’interés turísticu y los cartelos y plaques informatives.
Lo que nun recueye’l plan ye l’usu igualitariu de les llingües. El resultáu, la nueva cartelería del conceyu, cola versión n’español enriba, en prietina y a duple tamañu, entantu que los nomes n’asturianu queden arrequexaos al nivel del inglés, debaxo ya en piqueño, comu una torna a llingua foriata.
Aparte, nos mástiles de les señales pue lleése facilmente “Gijón”, incumpliéndose asina tamién la parte de respetu a la toponimia ya imaxe corporativa.
La reación de los xixoneses nun se fexo esperar y nes redes sociales alcontramos decenes d’usuarios indignaos con esta nueva cartelería, que consideren una amuesa de la política municipal pa col asturianu y una ofiensa pa los asturifalantes, al tratase d’una discriminación direuta de la llingua asturiana frente a la española.
Llucía F. Marqués
This work is licensed under a Creative Commons Attribution 4.0 International License.
