Entra güei la primavera y entamen ya a amburar les viesques n’Asturies. Los axentes de mediu rural denuncien que los deberes tan ensin facer “Descontrol, falta de planificacion, falta de medios ya improvisación. Tristemente la situación repítese una y otra vez ensin que naide asuma responsabilidaes”

Pela prensa sabemos qu’Asturies torna arder. Peles redes sociales podemos saber, amás, que los servicios públicos que tendríen d’amatar con eficiencia esos fueos nun tan dotaos de los medios materiales nin humanos pa facelo, tan descoordinaos y lleven tiempu, munchu tiempu, avisando de qu’esto diba tornar a pasar. ¿Cómo pue ser qu’entá nun ten afitaes les comarques de xixilancia, que se desaprofiten los escasos recursos humanos en dos ‘especialidaes’ cola mesma función, que sigan faltando medios materiales básicos comu emisores o vehículos afayaizos? esa ye la entruga que llancen los profesionales que ponen en pelligru la so vida pola ineficiencia d’un Principado que, non contentu con permitir que se llanten hectarees d’árboles altamente inflamables y con negar la xestión comunal de los montes, descuria un serviciu de, lliteralmente, vital importancia pal ecosistema asturianu.

A entamos de marzu, nes redes de ‘Agentes del Medio Natural’ avisaben de que, llegando a la época l’añu con más riesgu d’incendios, taben a la espera de la comarcalización pa les xixilancies preventives y zones de guardia Infopa “por nun falar de la falta  de medios tan fundamentales como emisores, drones o vehículos prioritarios o la coordinación eficiente de medios”.

“El fechu de que tengamos una ‘época de riesgu’ de’incendios forestales, siempre nes mesmes feches y siempres nes mesmes zones, ye pa polo menos reflexionar un puquiñín”, retruquen dende Bomberos d’Asturies aludiendo a la falta de previsión por parte de l’alministración.

Un de los profesionales que pasaron la nueche enfrentando los diez incendios activos güei insistía nel so canal “Lo que diba pasar güei sabíenlo fasta les piedres!!! Y nos ensin coordinar, ensin xente, yo sigo ensin EPIs y nun serviciu que nun me da nin medios, nin me correspuende Una nueche llarga pa munchos. Que nun-y pase na a naide!!”.

Llucía F. Marqués

This work is licensed under a Creative Commons Attribution 4.0 International License.