La Bona Confradería de los Siceratores d’Asturies nomó ayeri a cuatro nuevos miembros de méritu y a un miembru de númberu destacáu pola so curtia edá

El Muséu de la Sidre d’Asturies, en Nava acoyó l’actu de cellebración de la primavera, cola consecuente apertura de toneles, ya’l nomamientu de los cofrades de méritu Nisén Ángel Díaz Carazo, comercial de Sidra Castañón y artífice del ritu del hermanamientu de la sidre, l’artista Nieves Gónzalez, los miembros del Ochote Los Ñerbatos y Juan José Tomás, llagareru de Sidra JR, ganadora de la cabera edición del Festival de la Sidra de Nava.

Amás, fizo’l xuramentu de cófrade de númberu a Iyán Dos Santos Fernández. que con namás 14 años ya declara ser un entusiasta de la cultura sidrera asturiana.

Odón del Paganéu abrió l’actu cola interpretacion de l’asturianada ‘Ya llega la primavera’, dando pasu a una breve intervencion del direutor del Muséu de la Sidra, Juan Stové, siguíu pol saludu del alcalde navetu, Juan Cañal.

Ricardo del Río, presidente de los Siceratores, reclamó más inversión pa investigación sidrera y más atención a les pumaraes; elli, xunto con Milio del Nido,  dirixeron l’actu, presentando y acoyendo a los nuevos confráderes de méritu col ritu de la imposición de capa y montera, el toque de mayu, el culín de sidre ya’l xuramentu.

Tolos homenaxeaos corcharon en direutu una botella del tonel d’hermanamientu de les sidres d’Asturies que llevaron pa casa d’alcordanza y presllóse l’actu con una actuación de Vicente Díaz y un sentíu ‘Asturies Patria Quería’ canciáu por tolos presentes y acompangáu pola gaita de Pelayo Cuaya.

Darréu l’actu, tolos asistentes desplazáronse’n procesión hasta’l llagar de Lolina, onde tuvo llugar la correspondiente espicha, amenizada poles voces del Ochote los Ñervatos, Ismael Tomás, Odón del Paganéu y la gaita de Xuacu Amieva.

Enllaz a galería de Semeyes

This work is licensed under a Creative Commons Attribution 4.0 International License.