El gobiernu irlandés estudia la propuesta llevada polos asturianos pa la participación na Rede Europea de Ciudaes de la Sidre, Cider Cities

La sidre ye ún de los munchos puntos de xunión pente’l pueblu asturianu y l’irlandés, col que tenemos muncha cultura ya hestoria en común. Asina lo ficieron ver los miembros de la directiva de la Rede Europea de Ciudaes de la Mazana y la Sidre -Cider Cities- ente los que s’alcuentra el sociu fundador y presidente de la Fundación Asturies XXI, Marcos Abel Fernández desplazaos a Cork pa aconceyar con dellos miembros del gobiernu irlandés y del condáu de Cork. 

Na mañana del vienres tuvo llugar l’aconceyamientu col Ministru irlandés de Mediu Rural y Desendolcu Comunitariu Jerry Buttimer y col conceyal del condáu de Cork, Jack White.

Nesi alcuentru convidóseyos formalmente a participar en Cider Cities, desplicándose-yos con detalle en que consiste esta asociación de ciudades y conceyos productores de sidre per toa Europa y en qué consistiría esta colaboración.

Jerry Buttimer mostróse perinteresáu na colaboración y comprometióse a treslladar la información al restu’l gobiernu irlandés, especialmente al senador que trabaya a nivel d’asociaciones rurales y a los representantes del so país nel parllamentu europeu.

A la tardi, la delegación asturiana aconceyó con Moira Murrell, CEO del Ayuntamientu de Cork, con quien falaron de les posibilidaes concretes de collaboración pente los integrantes de Cider Cities.

La selmana que vien continuarán colos aconceyamientos, apurriendo al presidente de la Cámara de Comerciu de Cork una carta del presidente de la Cámara de Comerciu xixonesa. Finalmente el martes 25 falarán con Clir Dan Boyle, alcalde de Cork.

Esti viaxe valdrá pa reforciar el venceyu pente Asturies ya Irlanda, que tien nel conceyu de Cork una de les sos principales fasteres sidreres, potenciando l’avance del sector sidreru europeu comu una comuña.

Nel Dos Santos

This work is licensed under a Creative Commons Attribution 4.0 International License.