La Plataforma denuncia’l desconociminetu del Plan de Llabores, l’ausencia de permisos municipales pa los trabayos de prospección realizaos por Astur A. y la falta de tresparencia por parte de l’alministración del Principado
La Plataforma Salvemos Peñamayor solicitó nel mes de Xunetu l’accesu al espediente que tendría de contener el Plan de Llabores correspondiente al primer añu de trabayos de la empresa minera. Asturmet remitió esa información a la Dirección Xeneral d’Enerxía y Minería nel mes de Xunetu, polo que nun tendría de faltar esa documentación, importante porque recueye con esactitú qué trabayos y en qué llugares van realizase eses llabores a lo llargo del primer añu de permisu d’investigación, ello ye, permite saber que zones y que vecindaes van ser les primeres afectaes poles llabores d’investigación.
El fechu de qu’esta información se trate como secreta y se niegue l’accesu a ellanon solo dificulta les llabores d’información, sinón que fae albidrar lo pior.
Conocer el Plan de Llabores, permitiría que los conceyos afectaos exercieren les sos competencies urbanístiques ya que, como s’afita nes condiciones particulares, recoyíes nel otorgamientu, la empresa tien de tener los permisos urbanísticos pertinentes pal desendolcu de los trabayos y en bona parte del perímetru afectáu nun ye posible realizar estos trabajos acordies cola normativa urbanística municipal. Remarquen que nin nel Conceyu Bimenes, ni en Llaviana, nin en Nava se recibió dala solicitú de permisu por parte de la empresa, polo que si fasta agora se realizó dalgún trabayu, seya la recoyía de muestres, sea de cualisquier otra naturaleza, fadríase illegalmente.
El Plan tamién indicaría la propiedá del tarrén sobre’l que va actuase; porque, independientemente del permisu otorgáu pola Conseyería, Asturmet Recursos tien de tener el permisu del propietariu pal desendolcu de los trabayos proyectaos, seya un particular o una administración. La Plataforma Salvemos Peñamayor denuncia que’l fechu de que les vecines y vecinos con propiedaes dientro del permisu y los propietarios del monte común nun conozcan la llocalización de los trabayos que van a llevase a cabu, déxalos “nuna situación de clara indefensión a la hora de defender los nuesos drechos, incluyíu’l de propiedá”
Por tou ello los conceyos de Bimenes y Llaviana xunto cola Plataforma vienen de solicitar a la Conseyería el Plan de Llabores, ensin que, trescurríu ya’l mes estipuláu pa retrucar estes solicitues según la Llei de Tresparencia, se recibiere retruque dalu.
Llucía F. Marqués
This work is licensed under a Creative Commons Attribution 4.0 International License.
