Social Nómades anúnciase comu “la plataforma qu’ayuda a nómades dixitales a trabayar y vivir en redolaes rurales d’Asturies”

La iniciativa, impulsada por Bel Consultores, consiste en facilitar la ocupación de los pueblos asturianos, ufiertando a los nómades dixitales “una escelente calidá de vida nuna redolada natural, con bona conectividad, viviendes algamadices y sofitu institucional pal desendolcu profesional”. Ello ye, un paraisu a precios de saldu nel qu’amás les istituciones van poner tou  al so serviciu (lo de la bona conectividad, tantu física como dixital, ta por ver).  Pa ufiertar a los recien llegaos una redolada al so gustu, ufierten ensin disimulu “tresformar les redolaes rurales n’espacios afayaizos pa los nuevos residentes”. Nun ye la única aniciativa d’esta triba n’Asturies y toes elles remaquen ensin vergoña qu’Asturies ye un paradisu low cost, onde’l coste de vida ye un 17% más baxu qu’en Madrid y un 15% más económico que’n Barcelona… nun digamos respeuto a capitales europees.  La propuesta ye vivir con sueldos d’allí colos precios d’equí, una esperiencia que ya salió mal en Portugal. 

Amás, los nómades, como’l so nome indica, nun vienen pa quedase nin crear un proyeutu de vida estable n’Asturies, la mayoría pasará equí unos meses, ensin implicase más de lo necesario col país, y colará dexando’l sitiu a otru.

La primera y más evidente consecuencia d’esti tipu de proyectos, que yá tamos esperimentando, ye l’encarecimientu esponencial de les viviendes y del coste de la vida nos pueblos asturianos. La segunda pero non menos importante, ye la perda del enorme mancomún cultural de les zones rurales asturianes y el desterciu de les formes tradicionales de vida. Pa estes persones conceutos como sestaferia, andecha, sidre casero o fiesta de prau van ser -y van siguir siendo- totalmente desconocíos.

Ciertu que los pueblos taben quedándose vacios; llevamos décades viendo como la mocedá ya’l talentu ye espulsáu d’ellos a base d’enzancar los medios de vida tradicionales y negar los servicios más básicos, como colexos, carreteres segures o centros médicos. Quiciabes les coses fueren distintes si ufiertáremos a la mocedá asturiana y a los que tuvieron qu’abandonar esos pueblos pola falta de condiciones lo mesmo que se ta ufriendo a los foriatos (fálase yá d’ameyorar servicios, ampliar conectividad, incorporar ufierta educativa, crear planes d’empléu, ayudes nos trámites alministrativos…).

Garanticen, dicen, el futuru de los nuesos pueblos. La única pega ye que pa entós, yá nun van ser los nuesos pueblos. 

This work is licensed under a Creative Commons Attribution 4.0 International License.