Más de mediu millón de neños, neñes y adolescentes viven nun llar que sufre carencia severa ya’l 16,7% de los llares con menores nun puede caltener la casa a una temperatura afayaíza nel iviernu
El costu la vivienda aumenta en casi 10 puntos porcentuales los yá bien altos niveles de probitú infantil. Asina, l’Estáu español cuenta yá con una de les peores tases de probeza infantil de la Xunión Europea al algamar el 28,9%, lo que se traduz en más de dos millones de menores.
N’Asturies, el riesgu de probitú y esclusión social llega al 20,9 %, mientres que la carencia material y social severa llega al 5.6%. Les persones que nun pueden mantener la vivienda a una temperatura afayaíza son el 15,2% y el porcentaxe de persones con retrasos nos pagos rellacionaos cola vivienda pasen del 13,6 % en 2023 al 14,2 % en 2024.
D’esta forma, la vivienda ta convirtiéndose nun bien ca vez menos accesible pa munches families y ye ca vez más un factor importante d’aumentu de la probitú infantil.
La xubida de precios de la vivienda y la falta d’accesu a la mesma per parte de families vulnerables son dalgunes de les causes que lleven a munches families a soportar costos escesivos, disponer de menos recursos, vivir enfacinaos en cases precaries o direutamente n’infraviviendes.
La falta d’una vivienda afayadiza supón una torga p’aportar al drechu a un nivel de vida apropiáu y afeuta a les oportunidaes de futuru de los neños, neñes y adolescentes, amás de repercutir n’otros ámbitos y drechos de la infancia. Pasar demasiáu fríu o calor en casa puede derivar en problemes de salú física pa los neños y neñes, que, amás, tán en mayor riesgu de sufrir accidentes domésticos rellacionaos con incendios o intoxicación si viven en llares onde s’utilicen alternatives al suministru enerxéticu como veles o estufes.
Amás, tamién tien efeutos sobre la salú mental, derivaos de la incertidume ante la inseguridá residencial o por vivir enfacinaos, lo cual puede xenerar enfermedaes cróniques, depresión y otres afeiciones. Nun disponer d’un espaciu propiu o escarecer de recursos básicos como lluz y temperatura afayadices tamién afeuta a la educación de los neños y neñes y les sos oportunidaes.
(Los datos apurríos nesti testu provienen del informe presentados por UNICEF-España y la y la Rede Europea Escontra la Probeza y la Esclusión Social-Asturies).
This work is licensed under a Creative Commons Attribution 4.0 International License.
