Ún de los medios de vida tradicionales que ta en rápida vía de desaniciu n’Asturies ye’l de la pesca: añalmente piérdense una media d’ocho barcos pesqueros, 37 el caberu añu

Ca vegada hai menos barcos pesqueros y por tantu, menos marineros que viven d’ellos n’Asturies: en concretu, d’alcuerdu a los datos que remana’l Ministeriu de Pesca, taben rexistraos, a zarru de 2023, un total de 291 buques, 135 menos qu’en 2006. Si se debuxa un horizonte temporal más ampliu, en 1985 había nos puertos asturianos 730 barcos censaos.

Nel añu 2025, depués de perder otros 37 barcos dende’l recuentu d’entamu del 2024, cuntamos namás con 254 embarcaciones, ello ye, cuasique un terciu de los qu’había va 40 años. Si nun se refuercia’l sector, en diez años ye difícil que queden pescadores n’Asturies. 

L’amenorgamientu de les captures, xenerada pola contaminación marina, la degradación de los ecosistemes y la sobrepesca, xúnese a restricciones y a repartos de cupos de pesca que nun avecen beneficiar a la flota asturiana.

La pesca artesana tienlo difícil pa competir cola importación de pexe, especialmente d’Asia, y cola pesca d’arrastre; los pescadores asturianos denuncien l’incumplimientu de les regulaciones por parte de grandes pesqueros que venden en munchos casos les sos captures nes rules asturianes. Asina, vemos entrar a diario a los muelles asturianos buques de grandes dimensiones,  arrastreros mayormente, con matrícules principalmente de Cantabria, País Vascu y Galicia.