Acordies los caberos datos analizaos pola Conseyería de Movilidá, Cooperación Llocal y Xestión d’Emerxencies, los accidentes con víctimes mortales na rede de carreteres del Principáu, ello ye, naquelles víes competencia del Gobiernu de Asturies, multiplicáronse por cuatro en cinco años

Asturies preslló l’añu 2024 con 27 finaos nes carreteres asturianes. A lo llargo d’esi añu produxéronse 25 accidentes mortales y otres 121 persones riquirieron d’hospitalización. Nel añu 2023 hubo 24 accidentes mortales nos que perdieron la vida 26 persones. En 2022, foren namás siete los accidentes que llevaron a fallecimientu. 

No que llevamos d’añu rexistráronse n’Asturies nueve muertes por accidentes de tráficu -más qu’en tou 2022- lo qu’equivaldría a 36 añales, de siguir al mesmu ritmu. La proporción de conductores sol efectu de estupefaccientes, sicasí, amenorgó siendo munchos los accidentes nos que’l conductor “salióse de la carretera ensin causes conocíes”.

El xorrecimientu del númberu de víctimes rescampla y colectivos d’automovilistes resalten les males condiciones de les carreteres, dalgunes de les cuales fueren denunciaes -ensin respuesta per parte de l’alministración- meses anantes de los accidentes, como ye’l casu de la carretera de Pion, onde un home perdió la vida esti mesmu mes.

Pa ver l’estáu de les carreteres asturianes basta dar una vuelta, por casu, a la transitada N-632,  anque la dexadez faise más patente na zona rural: carreteres fundíes, señalizaciones cubiertes pola maleza, torgues na via, baches ya inclusive pequeños argayos o árboles cayios que se queden ende hasta que dalgún vecín los retira. 

Nel Dos Santos