Traslladémoslo a cualesquier otru delitu. Róbente la cartera, delles vegaes, la mesma persona, a cara descubierta, en distintos llugares de la to ciudá, inclusive con testigos. Pero sigues diendo trabayar y nun camudes de casa; nin vas al mélicu, sinón a la policía. Dempués de denunciáu, yá nun te roba más vegaes; poro, ye inocente

L’Audiencia d’Asturies considera que pa ser condergáu, la conducta del acusáu “debe xenerar na víctima una alteración grave nel desendolcu de la so vida ordinaria” y anula la conderga porque la víctima “caltuvo les sos rutines diaries”

El tribunal reconoz que la muyer sufrió dellos episodios d’acoso, ente avientu del 2020 y xunu del 2022, tantu diendo sola como acompañada, nos que l’acusáu averóse a ella con proposiciones de conteníu sesual, que llegó a glayar de viva voz mientres la siguía de nueche cuando diba sola pa la so casa, teniendo qu’abellugase en más d’una ocasión n’establecimientos cercanos, dende los que llamó a la policía. Tamién s’averó a ella per detrás, garrándola ensin previu avisu. La relación ente dambos llindábase a qu’él yera veceru nel chigre onde ella trabayaba de camarera.

El tribunal reconoz los fechos, pero como la víctima nun camudó de casa, nun dexó’l so trabayu, nun recibió asistencia médica y siguió caminando sola pola cai, valora que “se vé que muncho trestornu nun-y causó” y l’acusáu foi absueltu, anulándose l’anterior conderga qu’incluyía amás l’alloñamientu de la víctima. El tribunal tamién valora positivamente que, desque lo denunció, los fechos nun se repitieron.