La empresa municipal Divertia apuesta pola fiesta cervezera perriba de los intereses de los hosteleros al tiempu que dificulta la cellebración de la folixa sidrera de la Primer Sidre l’Añu
L’Ayuntamientu da la cara defendiendo frente a los hosteleros la cellebración de la ‘Muestra Internacional de la Cerveza de Gijón 2025’, entamada pola Asociación Milla Cervecera de Xixón, al tiempu que pon toles torgues posibles y niega espacios a un eventu sidreru como la Primer Sidre L’Añu.
El tratu diferencial que se da en Xixón a cerveceres y llagares ta nidiu: pente una cellebración consistente esclusivamente en vender cerveza y una otra qu’inclui tolos aspeutos de la Cultura Asturiana de la Sidra -recordemos, Padremuñu Inmaterial de la Humanidá pola UNESCO- la prioridá ye la cerveza.
Mientres a la Primer Sidre l’Añu se-y negó l’usu del Muséu del Pueblu d’Asturies, por razones entá ensin esclariar, y se-y negó tamién l’espaciu Xixón Arena (el mesmu nel que va cellebrase l’eventu cerveceru), poniéndose-y infinidá de torgues de toa triba pa continuar cola so llabor de caltenimientu y espardimientu de la cultura propio, la empresa municipal xixonesa Divertia apuesta firmemente pola cellebración d’un eventu que promocione’l consumu de la bebida que más directamente fae la competencia a la sidra asturiana, enfrentandose incluso pa ello cola hostelería de la ciudá, que lo considera una competencia deslleal pa colos sos negocios, ya que l’eventu va cellebrase en Semana Santa, una fecha importante pa la hostelería, y va presllar a les doce la nueche, horariu incompatible con acudir depués a les cerveceríes de la ciudá.
Susana Sela
This work is licensed under a Creative Commons Attribution 4.0 International License.
