Los dos estudiantes de mirandés vienen a Asturies gracies a la beca ‘Agabones Família Schmidberger Fernandes’ que fae por dar puxu al estudiu y caltenimientu del mirandés
Gracies a la beca ‘Agabones Família Schmidberger Fernandes’ los dos meyores y más comprometíos estudiantes de mirandés, la variedá del asturianu falada en Portugal y qu’allí sí ye oficial, tán estos díes na Residencia Lliteraria Xixón. Son Isaac y Sara y van tar una selmana nuna estancia cultural na que van percorrer Asturies y los nuesos raigaños comunes, percorriendo espacios como’l Muséu del Pueblu d’Asturies, l’Academia de la Llingua Asturiana o la Xunta Xeneral d’Asturies, ente otros espacios.
Estos estudiantes de mirandés premiaos cola beca van ufrir una charra sobre’l mirandés y la so esperiencia a alumnáu d’asturianu en Xixón, buscando afondar na comunicación ente los dos territorios que comparten llingua magar les distancies.
Los mecenes d’esta iniciativa son la familia Schmidberger Fernandes, Aníbal Fernandes, nacíu n’Angueira, nel conceyu de Vimioso y la so muyer, Vera Schmidberger Fernandes, qu’asina quieren amosar “l’amor y ciñu que sienten pola cultura y llingua mirandesa y naguando por animar ya incentivar a los alumnos del Agrupamento de Escolas de Miranda dl Douro al estudiu de la llingua mirandesa y la so consiguiente preservación, asina como recompensar l’esfuerciu y el méritu”.
Susana Sela
This work is licensed under a Creative Commons Attribution 4.0 International License.
