Nun importa si se fae nel Pueblu d’Asturies, en Cimavilla o na Feria de Muestres, los incondicionales de la sidre siguen esti eventu pelos estremaos allugamientos de Xixón pa nun perdese estos cuatro díes de folixa y cultura sidrera asturiana

Diez mil persones, esa ye la cifra d’asistentes mayores d’edá apurrida pola organización -los menores, acompangaos siempres, nun se contabilizaron-.

Atrayios pola posibilidá de prebar la sidre de 50 llagares, polos conciertos, les charres, les tasties o cualquiera de les múltiples opciones d’arruelu cientraes na cultura tradicional asturiana qu’esti eventu ufre, los sidreros y los que quieren deprender sobre la cultura sidrera diéronse

cita por miles nel Pabellón Asturies de la Feria de Muestres y los sos alrodios; con un espaciu a techu cuatro vegaes mayor que l’anterior tendayu, el nuevu allugamientu abellugó ensin problema los asistentes, que tuvieron a la so dimposición meses y silles, un ampliu espaciu dedicáu a la reciella, una llarguísima barra atendía por hasta siete echaores ensin descansu y una zona pa los conciertos, nos que s’entamaron bailles multitudinarios, amás del Espaciu Unesco, onde se desendolcaron les presentaciones de llibros, tasties y prebes d’Alimentos del Paradisu.

Tou eso nel interior. Fuera, alrodiu l’horru y arrodiando’l pabellón, dellos toneles servíen sidre n’autoserviciu y una zona d’esportes tradicionales permitía xugar al dexabolu, la llave o la rana, mientres los gaiteros d’El Gumial animaben l’ambiente y afalaben al baille. 

En resume, una folixa con tolo que tien de tener una folixa asturiana, cuatro díes pa entamar la temporada sidrera con bon pie. 

Susana Sela

This work is licensed under a Creative Commons Attribution 4.0 International License.