El Sindicatu d’Ensiñantes SUATEA valora en 21’9 la perda de poder adquisitivu de los docentes nos caberos quince años y denuncia que les caberes xubíes salariales, dalgunes entá ensin aplicar, son insuficientes, siguiendo ensin recuperase les pagues estra íntegres
Dende’l 2010, l’Índiz de Precios de Consumu (IPC) medró un 36,4 %, bien perriba del xorrecimientu salarial de los docentes, que malpenes algamó un 14,5 % en promediu. Esto supón una perda de poder adquisitivu del 21,9 %.
A empiezos d’esti 2025, el Gobiernu anunciaba, tres un pactu colos sindicatos CCOO y UXT, una xubida adicional del 0,5 % pa los docentes, que se sumaba a la medría del 2 % yá aprobáu pa 2024. Dende SUATEA declaren que “esta xubida salarial namás podemos calificala como d’insuficiente dafechu, ya en dengún casu compensa’l deterioru económicu careciu mientres los caberos años”. A ello, remembren, suma la perda de pagues estraordinaries que yá denunciaron al traviés de la Confederación Intersindical, ya que mentantu la Llei 30/1984 afitaba que les pagues estraordinaries teníen d’equivalir, polo menos, a una mensualidá completa de sueldu y trienios, cola crisis de 2008 amenorgóse la so cuantía en redol a un 40 %, un retayu qu’entá persiste y que se traduz n’una cuantía d’hasta 18.344 € dende entós, dependiendo de l’antigüedá, entantu que los trabayadores del sector priváu siguieron percibiendo les sos pagues íntegres.
La clave del problema ta, aportunen dende’l sindicatu, en que les xubíes salariales nuntan venceyaes al IPC, lo que xeneró un desfase xorreciente pente los ingresos del profesoráu y l’aumentu del costu de la vida, especialmente de magar el 2010.
Nel Dos Santos
This work is licensed under a Creative Commons Attribution 4.0 International License.
