Una prestosa y perinteresante propuesta pa la mocedá que quiera conocer Asturies en tolos sos aspeutos: xeográficos, climáticos, flora y fauna, xeolóxicos ecoloxicos, historicos, etnográficos …. trece díes -26 pa los  más valientes- percorriendo’l cordal en comuña con dalgunos de los más espertos guies de montaña del país

La propuesta parte del grupu montaña Alandrina y ye de les poques actividaes braniegues enfocaes nesi marxe d’edá –pente 14 y 17 años-. Trátase d’un percorríu d’unos 380 km nel que s’ascienden más de 70 cumes, durmiendo en refuxos y campamentos itinerantes, una esperiencia única que se divide en dos sectores, de L.leitariegos a San Isidro y d’ellí al Alto Campoo, pudiendo facese cualisquier de los dos sectores por separtao o los dos continuos.

Sicasí, la so mayor pecularidá reside n’acomuñar l’arruelu col deprendizaxe direutu; Amás de la xeografía y la hestoria qu’esti ambiciosu percorríu lleva implícito, deprenderán a identificar pol so nome animales, plantes y minerales, conocerán tradiciones, toponimia, téuniques de montaña y seguridá, climatoloxía, curiosidaes… pero non solo va ser deprender. L’envís ye crear pente los participantes un marcu d’interación que permita a caún compartir los sos conocimientos ya inquietudes, medrando en comuña.

La actividá desendolcaráse del 1 al 14 y del 16 al 27 de Xunetu y demientres tola travesía dirán guiaos por espertos guíes de montaña ya intérpretes del mediu natural de la montaña Cantábrica. Fadrán nueche n’abellugos o campamentu itinerante, con apoyu de carretera. Pa más información, visitar les redes sociales de la A.D. Alandrina, onde tamién pue topáse información sobre los sos Campamentos de branu en Cerulleda, pensaos pa rapacinos de 7 a 13 años.

L’asociación nun descarta ampliar la so ufierta faciendo una Travesía del Cordal p’adultos, casu qu’hubiere demanda. 

Llucía F. Marqués

This work is licensed under a Creative Commons Attribution 4.0 International License.