Pica Pica HackLab ufre n’Uviéu una xornada d’averamientu a la informática llibre como drechu nuna sociedá onde lo dixital ye cotidiano
El movimientu de la informática llibre defende qu’el software (los programes o aplicaciones d’ordenador) y el hardware (los componentes físicos o materiales de les computadores) tienen de poder ser usaos, modificaos y compartíos por cualesquier persona, ensin imposición de restricciones técniques, llegales o económiques, como drechos y llibertaes de toles persones. Coles mesmes, defenden que la información tien de tar igualmente disponible, non solo pol bien de la persona a títulu individual sinón tamién de la población polo xeneral.
Estos drechos y llibertaes son entá más importantes nun momentu nel que les actividaes cotidianes tán ca vegada más mecies cola informática, siendo casi imposible defendese nel día ente día ensin un accesu mínimu a la redolada dixital.
El sábadu 26 d’abril de 2025 en L’Olivar (Cai Escura, nº 1/3 – Uviéu), Pica Pica HackLab (PicaHack) entama una xornada de iniciación a la informática llibre, destinada a persones con poques conocencies sobro la tema pero interesaes nes implicaciones étiques, sociales y ambientales de les tecnoloxíes de la información.
L’actividá va consistir nuna charra d’introducción a la informática llibre y otra charra sobro la llibertá d’información, siguíes d’una “toma de contactu” de les persones asistentes col usu de sistemes operativos llibres por aciu ordenadores de demostración y la posibilidá d’instalalos a quienes quieran y lleven el so ordenador a la xornada.
L’actividá ye de baldre, anque va haber disponible un bote pa donativos. Más información nel sitiu web de Pica Pica HackLab (PicaHack).
Susana Sela
This work is licensed under a Creative Commons Attribution 4.0 International License.
