Nun país nel que la lluvia (o regar les cais en so defeutu) ye la principal midía en casu d’emerxencia por contaminación nel aire, ye interesante tener conocencia de los que son los principales contaminantes presentes nel aire de bona parte de los conceyos asturianos, asina como de les sos consecuencies pa la salú y la relación pente los niveles máximos almitios y les midiciones feches.
PM (Piqueñes partícules de Materia)
Formaes principalmente por compuestos inorgánicos -como silicatos y aluminatos, metales pesaos-, material orgánicu asociau a partícules de carbonu y otros compuestos, sólidos o llíquidos, incluyendo los ácidos (tales como los nitratos y sulfatos), estes partícules considérense peligroses cuando el so diámetru ye de 10 micrómetros o menos, ya qu’esi ye’l tamañu que yos permite pasar a traviés de les vies respiratories y entrar nos polmones. La esposición continua a les PM agrava el riesgu de desendolcar cardiopatíes y neumopatíes, asina como cáncer de polmón. Ocho estaciones asturianes superen d’avezu les llendes másimes permities.
Les mayores (PM10) alcuentrense nes prosimidaes de grandes carreteres ya industries. Les PM 2,5 (de menos de 2,5 micrómetros de diámetru) son les más pelligroses y fórmense cuando los gases emitios por plantes d’enerxía, les industries y los automóviles reacionen nel aire.
la Organización Mundial de la Salú recomienda unos valores llende de 20 µg/m3 de medía anual pa les PM10 y un valor d’alerta con una media diaria de 50 µg/m3 y pa les PM 2,5 de 10 µg/m3 con llende d’alerta pa 25 µg/m3 nes 24 hores. Pa facese una idega del problema n’Asturies, la estación de Tremañes en Xixón caltién una media anual de 49 µg/m3, superándose el nivel d’alerta 170 dies l’añu pasáu.
Ozonu a nivel del suelu :
Ta comprebá la relación direuta pente’l xorrecimientu de les midies de les concentraciones d’ozonu al nivel del suelu y los ingresos hospitalarios por problemes respiratorios. Arriendes d’ello l’ozonu puede ocasionar depresión del sistema inmunolóxicu y efeutos sistémicos en muérganos blandos como el fégado.
Reciella, presones con asma u otras enfermedaes de les víes respiratories, trabayaores nel esterior y amantes del esporte al aire llibre son los más vulnerables a los efeutos del ozonu “malu”, que nun se emite direutamente al aire, sinon que ye consecuencia de reaciones químiques pente ósidos de nitróxenu (NOx) y compuestos orgánicos volátiles (COV) en presencia de lluz solar.
Sicasí, hai pocos datos sobro esti problema, ya que les estaciones de medición asturianes nun cuenten col equipamientu precisu pa llevar un control sobro’l nivel d’ozonu a ras de suelu.
Ósidos de nitróxenu: NOx
El grupu de gases altamente reactivos conocios como “ósidos de nitróxenu (NOx) inclui el diósidu de nitróxenu (NO2), el ácedu nitrosu y ácedu nítricu.
El más frecuente, NO2, formase de les emisiones de los automóviles, camiones, autobuses y aerosoles de nitratu, pero mui especialmente nes centrales elléutriques.
Arriendes de contribuir a la formación de ozonu troposféricu y la contaminación por PM, el NO2 vinculase por si mesmu con una riestra de efeutos alversos nel sistema respiratoriu.
El valor fixáu poles Direutrices de la OMS pa entamar a tomar midies pa protexer a la población de los efeutos nocivos del NO2 ye de 40 µg/m3 (de media anual) y 200 μg/m3 de media en 1h. La estación de Corvera superó 132 dies esta norma y la de Gozón superó dellos dies les concentraciones qu’en ciudaes comu Madrid o París llevantaron pola mesma fecha l’alarma encarná.
Diósidu de azufre: El diósidu de azufre (SO2) ye parte d’un ensame de gases altamente reactivos conocios como ósidos de súlfuro.
Les principales fontes d’emisiones de SO2 provienen de la combustión de combustibles fósiles nes centrales elléutricas (73%) y otres istalaciones industriales (20% ósidos d’azufre). Tamién emiten SO2 dellos procesos industriales, como la estración de metales a partir de minerales, y la quema de combustibles con altu conteníu d’azufre poles llocomotores y barcos grandes.
El SO2 se vencéyase con una riestra d’efeutos dañibles pal sistema respiratoriu. Pesi a la denuncia de que les estaciones tan allugaes estratexicamente esquivando los puntos de mayor emisión, dalguna d’elles marcó fasta 76 dies niveles perriba la norma
Bencenu (C6H6,)
El bencenu ye un hidrocarburu poliinsaturáu que s’utiliza na manufactura d’otros productos químicos usaos pa la fabricación de resines, nylon, plásticos, pesticides, fibres sintétiques, gomes, deterxentes ya otros. Ye reconocíu como canceríxenu, ya que la esposición continua a elevaos niveles de bencenu nel aire, puede provocar lleucemia.
En dosis piqueñes el bencenu nel aire puede causar mareos, aceleración del baltíu del coral, dolores de tiesta, somnolencia, confusión, tremores y pérdida del conocimientu. Na sangre amenorga los glóbulos encarnaos, provocando tamién alteraciones na médula de los güesos. Puede producir hemorraxes y daños nel sistema inmunitariu, aumentando así les posibilidaes de contraer enfermedaes. En muyeres puede dar llugar a mestruaciones irregulares.
Per otru lláu, la so alta inflamabilidá fae medrar el riesgo d’incendios y explosiones.
Trubia ye’l llugar de la Península Ibérica que mayores concentraciones de b asta 77 µg/m3 y medies diaries d’alrodiu los 20. Remembremos que la OMS sitúa la llende almisible pal ser humanu en 5 µg/m3 de media. N’Avilés, otru de los conceyos más afeutaos por esta triba de contaminación denúnciase l’intencionáu allugamientu de los midiores llonxe de les fasteres más conflictives y en llugares especialmente llimpios polos vientos, lo que falsia enforma los resultaos que sicasí siguen siendo alarmantes.
Ante les presiones xeneraes pola población, el pasáu 12 de xineru Química del Nalón ua Industries Doy (Trubia) caltuvieron un conceyu nel qu’estudiaron tomar midies pa controlar la contaminación.
Pa finar, nun ta de más remembrar qu’estos contaminantes nun afeuten solamente al ser humanu, sinon que son igualmente dañibles pa la fauna asturiana.
